Genero-ikuspegiak berekin dakar egoera zehatzak aztertzea, emakumeei eta gizonei desberdin eragiten ote dieten egiaztatze aldera. Komunikazioaren arloan, konpromiso horren baitan biltzen dira beste ekintza batzuk, hala nola emakumeak ikusgai jartzea, estereotipo sexisten ordez emakume eta gizonen era askotako ereduak erakustea, indarkeria matxistei eta sexu- eta erreprodukzio-eskubideei buruzko informazioa nola lantzen den kontuan hartzea eta, halaber, feminismoaren diskurtsoak eta teoriak baliatzea, errealitate sozialez egiten dugun interpretazioa aberasteko. Komunikazio-prozesu orori eska dakiokeen gutxienekoa da ez diezaiola men egin eredu eta joera sexistei. Genero-ikuspegiari esker, joerak identifikatzeko gai gara, baina, horretaz gainera, ikuspegi horrek bestelako ikuspuntu batzuk eskaintzen dizkigu, berritzaileak, begirada estereotipatu eta androzentrikoak ezarritako mugen aurrean.